ۇكىمەتتىڭ قاۋلىسىمەن «بيزنەستىڭ جول كارتاسى – 2020» بيزنەستى دامىتۋ مەن قولداۋدىڭ ءبىرىڭعاي باعدارلاماسىنا وزگەرىستەر ەنگىزىلدى. بۇل وزگەرىستەر مەملەكەتتىڭ قولداۋىنا قول جەتكىزە الاتىن كاسىپكەرلەر سانىن ارتتىرادى دەپ جوسپارلانعان، دەپ جازادى Qamshy.kz اقپارات اگەنتتىگى.

نەگىزىنەن بيزنەستىڭ ساناتى، كاسىپكەرلەرگە قويىلاتىن تالاپتار مەن قولداۋ قۇرالدارىنىڭ شارتى بويىنشا وزگەرىستەر ەنگىزىلگەن. وسىلايشا، شاعىن جانە ورتا كاسىپكەرلىكتى قولداۋ ماقساتىندا جانە وڭىرلەردەگى بيزنەستى دامىتۋعا بيۋدجەت قارجىسىنىڭ جەتىسپەۋشىلىگى ماسەلەسىن شەشۋ ءۇشىن باعدارلامادان ءىرى كاسىپكەرلىك سۋبەكتىلەرى الىنىپ تاستالدى.   

جاڭا رەداكسيا بويىنشا، باعدارلامادان وبلىس پەن قالالىق اكىمشىلىكتەر جانىندا جۇمىس ىستەيتىن وڭىرلىك ۇيلەستىرۋ كەڭەسى (وۇك) الىنىپ تاستالدى. ەندى شاعىن جوبالاردىڭ نەسيەسىنە سۋبسيديا بەرۋدە شەشىمدى «دامۋ» قورى قابىلدايدى. 180 ملن تەڭگەدەن اسپايتىن نەسيەلەردى قور 5 جۇمىس كۇنى ىشىندە قاراستىرسا، 180 ملن تەڭگەدەن استام نەسيەلەر بويىنشا شەشىمدى ءبىرىڭعاي باعدارلامانىڭ وڭىرلىك ۇيلەستىرۋشىسى 21 جۇمىس كۇنى ىشىندە قابىلدايدى. كەپىلدەندىرۋ قۇرالى  بويىنشا قولدانىلىپ كەلگەن ءدال وسىنداي ءادىس شاعىن جانە ورتا كاسىپكەرلىككە قولداۋ كورسەتۋدە وتە ءتيىمدى ەكەنىن كورسەتتى.

كەپىلدىكتى توقتاتۋ شارتتارىنا قويىلاتىن تالاپتار دا جەڭىلدەدى. ول بويىنشا ەندى نەسيە 100% ماقساتتى تۇردە جۇمسالماعان جاعدايدا عانا كەپىلدىك بەرۋ توقتايدى.

سونداي-اق، ءبىر كاسىپكەردىڭ قولىنا تيەتىن نەسيە سۋبسيدياسىنىڭ سوماسىنا دا وزگەرىس ەندى. ول 4،5 ملرد تەڭگەدەن 2،5 ملرد تەڭگەگە دەيىن ازايدى. دەگەنمەن، نەسيە مولشەرلەمەسىن سۋبسيديالاۋ مەرزىمى بۇرىن ءۇش جىل بولسا، ءقازىر ۇزارتۋسىز بەز جىلعا وزگەردى. بەرىلەتىن كەپىلدەمەنىڭ مەرزىمىنە شەك قويىلمايتىن بولعاندىقتان، ەندى كەپىلدىك مەرزىمى نەسيە مەرزىمىنەن اسپايدى.  

سونىمەن قاتار، باعدارلاما بويىنشا سۋسبسيديالاناتىن نەمەسە كەپىلدىك بەرىلەتىن نەسيەنىڭ تۇراقتى بەكىتىلگەن ماكسيمالدى مولشەرلەمەسىنىڭ ورنىنا وزگەرمەلى مولشەرلەمە ەنگىزىلدى. سۋبسيديا قازاقستان ۇلتتىق بانكى بەكىتكەن بازالىق سىياقى مولشەرلەمەسىنەن اسپايتىن جانە 5 پايىزعا ۇلعايتىلعان نومينالدى سىياقى مولشەرلەرلەمەسى بار نەسيەلەرگە بەرىلەدى. ونىڭ 30-50 پايىزىن ۇكىمەت سالاسىنا قاراي سۋبسيديالايدى، ايىرماسىن كاسىپكەر ءوزى تولەيدى. كەپىلدىك شارت  بويىنشا وزگەرمەلى سىياقى مولشەرلەمەسى بۇرىنعى كەستە بويىنشا، ياعني ق ر ۇب بازالىق ستاۆكاسى + 5% دەپ ەسەپتەلەدى.

بيۋدجەتكە تولەنەتىن سالىق كولەمىنىڭ ارتۋىمەن بايلانىستىرىلاتىن تيىمدىلىك كريتەريى دە الىنىپ تاستالدى. ەندى ءبىرىڭعاي باعدارلاماعا قاتىسۋ شارتىنا سايكەس، كىرىستى ارتتىرۋ مەن جاڭا جۇمىس ورنىن اشۋ تالاپتارىنا ساي كەلسە بولعانى. باعدارلامانىڭ بۇرىنعى رەداكسياسىندا جوعارىدا اتالعان تالاپتارمەن قاتار، وڭ شەشىم العاننان سوڭ ەكى جىل وتكەن سوڭ سالىق ءتۇسىمىن 10 پايىزعا ارتتىرۋ دا تالاپ ەتىلەتىن. بۇل - كوپ كاسىپكەر ءۇشىن كەدەرگى ەدى. ءبىر ايتا كەتەرلىگى، اينالىم قاراجاتىن تولىقتىرۋعا باعىتتالعان نەسيەلەرگە تيىمدىلىك كريتەريى تالاپ ەتىلمەيدى.

قوناق ءۇي نەمەسە قوناق ءۇي كەشەندەرىن ساتىپ الۋ باعىتىندا جۇمىس ىستەيتىن شاعىن جانە ورتا كاسىپكەرلىك سۋبەكتىلەرىنە قويىلاتىن تالاپتار دا ىڭعايلى بولا ءتۇستى. بۇل قىزمەت ءتۇرى جوبالاردى سۋبسيديالاۋدى جانە نەسيەگە كەپىلدىك بەرۋدى ماقۇلداۋ كەزىندە  باعدارلامانىڭ شەكتەۋ قويىلاتىن كريتەرييلەرى تىزىمىنەن الىنىپ تاستالدى. 

2017 جىلى 2 287 جوبا سۋبسيديالانىپ، تولەنگەن سۋبسيديا 36،13 ملرد تەڭگەنى قۇرادى.  1 065 كاسىپكەر 38 ملرد تەڭگەنىڭ نەسيەسى بويىنشا كەپىلدىك الدى (2016 جىلمەن سالىستىرعاندا 112% ارتقان). كەپىلدىكتىڭ جالپى كولەمى 15 ملرد تەڭگە.